ພະນັກງານຫ້ອງການພົວພັນຕ່າງປະເທດ ມະຫາວິທະຍາໄລ ສຸພານວົງ ໄດ້ເຂົ້າຮ່ວມການເຝິກອົບຮົມກ່ຽວກັບການໃຫ້ ການບໍລິການ ຂອງ ຫ້ອງການພົວພັນຕ່າງປະເທດ ທີ່ຈັດຂຶ້ນໂດຍ ມະຫາວິທະຍາໄລ ໂບໂລຍາ ປະເທດອີຕາລີ ຜ່ານລະບົບທາງໄກ ໃນມື້ວັນທີ: 24, 26, 30 ແລະ 31 ພຶດສະພາ 2022 ພາຍໃຕ້ແຜນກິດຈະກຳ ຂອງ ໂຄງການ OPEN-ing Laos Higher Education System to Internationalisation Strategies (ເຊິ່ງເປັນໂຄງການສ້າງຄວາມເຂັ້ມແຂງໃຫ້ແກ່ຫ້ອງການພົວພັນຕ່າງປະເທດ ຂອງ ສະຖາບັນການສຶກສາ ຊັ້ນສູງ ໃນ ສປປ ລາວ ໃນການກຽມຄວາມພ້ອມເພື່ອຫັນສູ່ຄວາມເປັນສາກົນ) ທີ່ໃຫ້ການສະໜັບສະໜູນໂດຍສະຫະພາບເອີຣົບ.
ຈຸດປະສົງຫຼັກ ຂອງ ການເຝິກອົບຮົມຄັ້ງນີ້ແມ່ນເພື່ອແລກປ່ຽສປະສົບການ ແລະ ສຶກສາຕົວແບບ ໃນການຈັດຕັ້ງ ປະຕິບັດວຽກງານຮ່ວມມືສາກົນຈາກ ມະຫາວິທະຍາໄລ ຂອງ ບັນດາປະເທດສະມາຊິກສະຫະພາບເອີຣົບ.
ຫົວຂໍ້ການເຝິກອົບຮົມປະກອບມີ ຂະບວນການຕົວແບບໂບໂລຍາ (Bologna Process) ແລະ ຄູ່ມືລະບົບການຖ່າຍໂອນໜ່ວຍກິດ ຂອງ ສະຫະພາບເອີຣົບ, ການບໍລິການນັກສຶກສາຕ່າງປະເທດ ແລະ ການສົ່ງນັກສຶກສາໄປແລກປ່ຽນຢູ່ຕ່າງປເທດ ເຊິ່ງໃນການເຝິກອົບຮົມຄັ້ງນີ້ ນັກສຳມະນາກອນໄດ້ຮຽນຮູ້:
- ວິທີການຮັບສະໝັກເອົານັກສຶກສາຕ່າງປະເທດ;
- ວິທີການໂຄສະນາຫຼັກສູດສາກົນ;
- ການປະເມີນ ແລະ ການຍອມຮັບວຸດທິການສຶກສາ ຈາກ ຕ່າງປະເທດ;
- ການຮັບນັກສຶກສາຕ່າງປະເທດໂດຍສະເພາະການຊ່ວຍເຫຼືອນັກສຶກສາ ແລະ ການສະໜັບສະໜູນດ້ານການເງິນ ໃຫ້ແກ່ ນັກສຶກສາຕ່າງປະເທດ;
- ວິທີການແຍກປະເພດການແລກປ່ຽນນັກສຶກສາ;
- ແຫຼ່ງທຶນສະໜັບສະໜູນ ແລະ ຮູບແບບການບໍລິຫານຈັດການ;
- ການບໍລິການນັກສຶກສາກ່ອນ, ລະຫວ່າງ ແລະ ເວລາສິ້ນສຸດການແລກປ່ຽນ.
