ມະຫາວິທະຍາໄລ ສຸພານຸວົງ ໄດ້ມີການພົວພັນ ແລະ ຮ່ວມມືກັບບັນດາກະຊວງ, ພະແນກການຕ່າງໆ, ອົງການຈັດຕັ້ງ ທີ່ກ່ຽວຂ້ອງພາຍໃນ, ລວມທັງການພົວພັນຮ່ວມມືກັບສະຖາບັນການສືກສາພາຍໃນ ແລະ ຕ່າງປະເທດ. ມະຫາວິທະຍາໄລສຸພານຸວົງ ໄດ້ລົງນາມບົດບັນທຶກຄວາມເຂົ້າໃຈທາງດ້ານວິຊາການ (MOU) ຫຼາຍກ່ວາ 60 ສະຖາບັນ ໃນອາຊີ, ເອີຣົບ, ສະຫະລັດອາເມລິກາ. ເນື້ອໃນທາງດ້ານການຮ່ວມມືມີດັ່ງລຸ່ມນີ້:

1. ການແລກປ່ຽນທຶນການສຶກສາ, ການຄົ້ນຄວ້າວິໄຈ, ຄະນະວິຊາ ແລະ ພະນັກງານ;
2. ການແລກປ່ຽນນັກສຶກສາ ແລະ ກິດຈະການ;
3. ການແລກປ່ຽນສິ່ງພິມ, ຂໍ້ມູນທາງດ້ານວິຊາການອື່ນໆທີ່ໜ້າສົນໃຈ;
4. ການຈັດການຄົ້ນຄ້ວາວິໄຈຮ່ວມກັນ, ນັກວິຊາການ ແລະ ການຈັດປະຊຸມສຳມະນາ ຮ່ວມກັນ ແລະ ການແລກປ່ຽນດ້ານວິຊາການຕາມການຕົກລົງເຫັນດີຂອງສອງຝ່າຍ.

ເນື່ອງຈາກວ່າ ມະຫາວິທະຍາໄລ ສຸພານຸວົງ ເປັນມະຫາສິທະຍາໄລ ຂອງລັດ ກ່ອນການເຊັນບົດບັນທຶກຄວາມເຂົ້າໃຈ ການຮ່ວມມືດ້ານວິຊາການ ກັບ ສະຖາບັນໃດໜຶ່ງ ຂອງ ຕ່າງປະເທດຕ້ອງໄດ້ຮັບການອະນຸມັດຈາກລັດຖະບານ ແຫ່ງ ສປປ ລາວ. ດັ່ງນັ້ນ, ມະຫາວິທະຍາໄລສຸພານຸວົງ ຕ້ອງໄດ້ປະກອບເອກະສານຂໍອະນຸມັດຕາມຂັ້ນຕອນດັ່ງລຸ່ມນີ້:

>> ເອກະສານປະກອບ

ລຸ່ມນີ້ເມ່ນເອກະສານປະກອບການຂໍອະນຸມັກເຊັນບົດບັນທຶກຄວາມເຂົ້າໃຈການຮ່ວມມືດ້ານວິຊາການ ຈາກ ລັດຖະບານ ແຫ່ງ ສປປ ລາວ:

• ໜັງສືແຈ້ງເຈດຈຳນົງຈາກສະຖາບັນທີ່ຈະຮ່ວມເຊັນບົດບັນທຶກຄວາມເຂົ້າໃຈການຮ່ວມມືດ້ານວິຊາການ;
• ບົດບັນທຶກການປະຊຸມ (MOD) ຫຼື ສັນຍາການຮ່ວມມື (MOA) ທີ່ ສອງຝ່າຍໄດ້ເຊັນຮ່ວມກັນ;
• ບົດລາຍງານກິດຈະກຳການຮ່ວມມືທີ່ທັງສອງຝ່າຍໄດ້ຈັດຕັ້ງປະຕິບັກຮ່ວມກັນມາ;
• ບົດວິພາກການຮ່ວມື (SWOT);
• ຮ່າງບົດບັນທຶກຄວາມເຂົ້າໃຈການຮ່ວມມືດ້ານວິຊາການ;
• ໜັງສືສະເໜີຂໍອະນຸມັດໃຫ້ເຊັນບົດບັນທຶກຄວາມເຂົ້າໃຈການຮ່ວມມືດ້ານວິຊາການ.

>> ຂະບວນການຂໍອະນຸມັດ

ຫຼັງຈາກມະຫາວິທະຍາໄລ ສຸພານຸວົງ ໄດ້ຮັບໜັງສືແຈ້ງເຈດຈຳນົງຈາກສະຖາບັນ ທີ່ຈະເຊັນບົດບັນທຶກຄວາມເຂົ້າໃຈການຮ່ວມມືດ້ານວິຊາການ ແລ້ວ ພະນັກງານຮັບຜິດຊອບວຽກງານສົນທິສັນຍາ ຂອງ ພະແນກຮ່ວມມືສາກົນ ແລະ
ຄຸ້ມຄອງໂຄງການ ຈະສຶກສາ, ຮ່າງ ແລະ ດຳເນີນເອກະສານຕ່າງໆລຸ່ມນີ້:

• ສຶກສາຂໍ້ມູນ ຂອງ ສະຖາບັນຄູ່ຮ່ວມ;
• ຮ່າງບົດວິພາກການຮ່ວມື (SWOT);
• ຮ່າງບົດບັນທຶກຄວາມເຂົ້າໃຈການຮ່ວມມືດ້ານວິຊາການ;
• ຮ່າງໜັງສືສະເໜີຂໍອະນຸມັດເຊັນບົດບັນທຶກຄວາມເຂົ້າໃຈການຮ່ວມມືດ້ານວິຊາການ ແລະ ເຊັນໂດຍທ່ານອະທິການບໍດີ ຂອງ ມະຫາວິທະຍາໄລ ສຸພານຸວົງ;
• ສົ່ງເອະສານທີ່ໄດ້ກ່າວມາຂ້າງເທິງໃຫ້ ກະຊວງສຶກສາທິການ ແລະ ກິລາ ໂດຍຜ່ານກົມສຶກສາຊັ້ນສູງ ແລະ ກົມພົວພັນຕ່າງປະເທດ;
• ຫຼັງຈາກນັ້ນ ເອກະສານຈະຖືກສົ່ງໄປກະຊວງການຕ່າງປະເທດຜ່ານກົມຕ່າງໆທີ່ກ່ຽວຂ້ອງ;
• ເມື່ອໄດ້ຮັບການພິຈາລະນາແລ້ວ ເອກະສານຈະຖືກສົ່ງກັບມາ ກະຊວງສຶກສາທິການ ແລະ ກິລາ ໂດຍຜ່ານກົມຕ່າງໆ ທີ່ກ່ຽວຂ້ອງ ເພື່ອສົ່ງຕໍ່ໃຫ້ກັບ ມະຫາວິທະຍາໄລ ສຸພານຸວົງ.

ບາງກໍລະນີ ເອກະສານຂໍອະນຸມັນແມ່ນຈະຖືກສົ່ງຕໍ່ໃຫ້ຫ້ອງການສຳນັກງານນາຍົກເປັນຜູ້ພິຈາລະນາ. ຕາມປົກກະຕິແລ້ວ ການຂໍອະນຸມັດເຊັນບົດບັນທຶກຄວາມເຂົ້າໃຈແມ່ນໃຊ້ເວລາລະຫວ່າງ 3 ເດືອນ ຫາ 6 ເດືອນ. ເມື່ອໄດ້ຮັບການເຫັນດີຈາກ ລັດຖະບານແລ້ວ ທັງສອງຝ່າຍຕ້ອງຈັດພິທີເຊັນບົດບັນທຶກດັ່ງກ່າວ ແລະ ລາຍງານໃຫ້ລັດຖະບານ ແຫ່ງ ສປປ ລາວ ຮັບຊາບພາຍໃນໜຶ່ງເດືອນນັບແຕ່ມື້ໄດ້ຮັບແຈ້ງການ ຈາກ ກະຊວງສຶກສາທິການ ແລະ ກິລາ.

ມະຫາວິທະຍາໄລ ສຸພານຸວົງ ແລະ ສະຖາບັນຄູ່ຮ່ວມຕ້ອງນຳໃຊ້ຮ່າງບົດບັນທຶກຄວາມເຂົ້າໃຈການຮ່ວມມືດ້ານວິຊາການ ແລະ ຮ່າງບົດບັນທຶກກອງປະຊຸມ ຂອງ ກະຊວງການຕ່າງປະເທດ ແຫ່ງ ສປປ ລາວ ສ່ວນເນື້ອໃນການຮ່ວມມືແມ່ນແລ້ວແຕ່ ການຕົກລົງເຫັນກັນລະຫວ່າງ ມະຫາວິທະຍາໄລ ສຸພານຸວົງ ແລະ ສະຖາບັນຄູ່ຮ່ວມ.